Dugnad

Frivillig arbeid

Som for dei fleste idrettslag i Noreg er drifta og vedlikehaldet i stor grad basert på frivillig arbeid. I dag omtalar vi denne forma for innsats som dugnad.

Det krev mykje arbeid, både synleg og bak kulissane, for å halde aktiviteten i gang og sørgje for at anlegga våre er velstelte og i god stand. Dugnad er derfor ein viktig del av drifta av idrettslaget.

Kortfatta rettleiing

Her har vi laga ei enkel og kortfatta rettleiing om gjennomføring av dugnadsarbeid, basert på informasjon frå Norges idrettsforbund (NIF).

Dei fleste idrettslag gjennomfører dugnader der medlemmene og eventuelt foreldra deira deltek. Dugnad bidreg til å redusere kostnadene til idrettslaget, slik at utgifter som elles måtte vore dekte gjennom medlems- eller aktivitetsavgifter, kan haldast nede.

Dugnadsarbeid kan til dømes vere:

• vedlikehald og oppussing av anlegg og klubbhus
• rydding og klargjering av anlegg
• matlaging og servering
• vakthald under arrangement
• loddsal og andre former for sal
• sal av til dømes toalettpapir, julekalendrar og liknande

Frivillig arbeid gjennom dugnad er ein viktig ressurs for idrettslaget og er ofte avgjerande for at medlemmene skal kunne få eit godt aktivitetstilbod.

Dugnadsarbeidet bør vere sosialt, inkluderande og kjekt å delta på. På den måten kan dugnaden òg bidra til å styrkje fellesskapet og samhaldet i idrettslaget.

Dugnadsvett – enkle køyrereglar

1. Dugnad er frivillig. Omfanget av dugnadsarbeidet bør stå i eit rimeleg forhold til medlemene si faktiske evne til å bidra. Idrettslaget bør leggje til rette for dugnad som ein sosial møteplass der medlemmene kan bidra og vere saman.
2. Ikkje-medlemmer kan ikkje påleggjast å delta. Idrettslaget kan ikkje krevje at personar som ikkje er medlemmer, skal stille på dugnad.
3. Deltaking kan gi redusert kontingent eller avgift. Idrettslaget kan vedta at medlemmer som deltek på dugnad, får ein rimeleg reduksjon i medlemskontingenten og/eller aktivitetsavgifta. Med aktivitetsavgift meiner vi utgifter knytte til aktivitetane i idrettslaget, til dømes treningsavgift. Ei slik ordning bør vere forankra i eit vedtak på årsmøtet.
4. Det kan ikkje innførast bøter eller dugnadsavgift. Idrettslaget kan ikkje ileggje «bøter» eller krevje betaling av ei «dugnadsavgift» frå medlemmer som ikkje deltek på dugnad.

Eit ofte stilt spørsmål

Kven avgjer kva arbeid som skal utførast på dugnad?

Det er idrettslaget sjølv som avgjer kva arbeid som skal gjennomførast som dugnad.

Dersom det er snakk om omfattande dugnadsarbeid, bør dette vere forankra i styret eller på årsmøtet. Mindre dugnadsoppgåver kan avgjerast på eit lågare nivå, til dømes av eit gruppestyre.

Det er samstundes viktig å hugse at dugnad er frivillig. Medlemmene skal derfor ikkje kunne påleggjast å delta eller få økonomiske sanksjonar dersom dei ikkje har høve til å bidra.

Attende